Thursday, September 14, 2006

فوازير رمضان الجديدة

بعد أن ودع المصريون فوازير رمضان إلى مثواها الأخير .. أبى البعض ألا يترك رمضان بلا فوازير .. والفوازير هذه المرة جديدة ومضحكة ومسلية جداً جداً جداً..

نعرف أن الحكومة قد قررت في وقت سابق من هذا الأسبوع العمل بالتوقيت الشتوي بدءاً من ليلة أول أيام شهر رمضان المبارك .. إلا أن بعض الخطباء في القاهرة - بشكل يعجز العقل الطبيعي عن تصديقه - قرروا الإفتاء بعدم الالتزام بقرار الحكومة الجديد.. "وهو ما يعني تأخير الإفطار ساعة كاملة طوال الأسبوع الأول من رمضان، الذي يحل في ٢٤ سبتمبر الحالي، ثم استكمال صيام بقية أيام الشهر الفضيل طبقا للتوقيت الشتوي الذي يبدأ أول أكتوبر، الموعد المعتاد لتغيير الساعة" والكلام لجريدة المصري اليوم..

أما موقف الدكتور فرحات السعيد المنجي أحد علماء الأزهر والذي يشاهد كثيراً على قناة المحور الفضائية فذهب أبعد من رفض الفتوى العبقرية التي أدلى بها الخطباء الأجلاء مطالباً بإلغاء التوقيت الصيفي الذي ورثناه عن الاستعمار البريطاني وأنه لا مبرر لوجوده وأنه "لا يعقل أن يظل هذا النظام سبباً في اضطراب شعائر المسلمين، وذريعة لتشكيك البعض في مواعيد إقامة الشعائر الدينية"..(لماذا لم نسمعه وقت أن قرر مشايخ السعودية بجرة قلم تغيير موعد عيد الأضحى المبارك قبل عامين في سابقة فضيحة في حد ذاتها؟.. ألم يربك ذلك ركنا ركيناً من أركان الإسلام؟)

أسئلة الفزورة كالتالي :

1-لماذا أفتى هؤلاء الجهابذة بتلك الفتوى الكوميدية التي لا أساس لها من أي شيء يمت للعقل والمنطق؟

2-علامَ يثار الجدل طالما أني أعرف ميعاد آذاني الفجر والمغرب في أول يوم رمضان وسيستمر الحال على ما هو عليه طوال الشهر؟.. كان من الممكن أن يكون لكلام الشيخ المنجي بعض الوجاهة لو قررت الحكومة الإبقاء على التوقيت الحالي لمدة ستة أيام ثم عدلته للتوقيت الشتوي.. وهذا هو ما لم يحدث!

3-لماذا أؤخر الصيام والفطور ساعة إذا ما تغير الوقت؟ بأي الأمور أعتبر : بالآذان أم بالساعة؟

لمن يستطيع الخروج بإجابات منطقية عن تلك الأسئلة ، يتصل على رقم 0000 على أقرب محمول لبقال جنب بيتكم .. وابقى قابلني!

10 comments:

saso said...

سؤال طفولي،، لو الفجر أذن الساعة 5 والمغرب الساعة 7 هتفرق عن لما يأذن الساعة 4 والفطار الساعة 6 ولا لا؟
:) والنبي دة سؤال يتسأل

يعني الآذان هياذن في ميعاد الحكومة ولا في ميعاد الخطباء
ولا كل جامع حر في ناسة بقي
المغرب ياذن في مصر الجديدة وبعدها بساعة يوصل العباسية ؟
لو مفيش ساعات خالص الفجر هيتاخر ولا هييجي بدري ولا هتفرق في اية؟

احنا وصلنا للدرجة دي امتي ؟ السجائر لا تفظر والادان الديجيتال ووقفة العيد الموحدة بلوي الدراع

بالمناسبة، احنا صدرّنا الفوازير ماودعناهاش

me2 said...

العملية مش ناقصة غباء
الأذان ماله و مال الساعة حد يفهمني!!!!
هو إحنا بنحدد الوقت حسب كلام الحكومة ولا حسب مواعيد ربنا (القمر و الشمس)!!!

ملحوظة: مش عارفة أعلق في فرجة لأن الأكاونت عندي تبع بلوجر بيتا و قفلوا الكومنتس في بلوجر لحد ما ينضموا مع بعض

زمان الوصل said...

بكل صراحه لم أسترح لقرار الحكومه تغيير التوقيت بدءا من شهر رمضان الفضيل .. وارى فى هذا نوع من التحايل الغير مريح خاصة ان الهروب من الصيام فى الحر لن يكون ممكنا للأبد .. لو كان القرار بالتخلّى عن تغيير التوقيت بشكل عام قد أتى بمعزل عن شهر رمضان الكريم و اقتناعا بسخافة الفكره ربّما وجدنا فى القرار بعض الوجاهه لكن ارتباطه بشهر رمضان فى الحقيقه لا يثير لدىّ اى قدر من الارتياح

tota said...

العزيز
انا بس مش فاهمة مش المغرب هيدن لما الشمس تغرب والفجر هيدن لما يتبين الخيط الابيض
تتقدم الساعة تتأخر الساعة كله مش فارق

يرحمونا بقى من الفتاوى العجيبة دى
هو الناس الفراغ عندها جامد كده مخليها تفتكس على الفاضى والمليان

الواحد فعلا تعب من الفتاوى دى

تحياتى

Sherif Nagib said...

المصيبة أن كل واحد من هؤلاء اسمه شيخ مسجد ! يعني وراه عشرات يثقون فيه و يسمعون كلامه و يسألونه الفتوى و يطلبون منه الرأي و المشورة في حلول مشاكلهم .. و هو شخص لا يدرك الحقيقة البسيطة التي أدركتها العصافير فتزقزق في الصباح و تخلد لأشجارها بغروب الشمس.. من غير ساعة و لا ستوب ووتش !

قلم جاف said...

كعادتنا نرد من الآخر :

شريف نجيب :

دي مشكلة اللي بيقف على منبر وهو مش أهل للثقة الكبيرة اللي الناس بيولوها فيه.. يقرا له كتابين تلاتة ويسمعله شريطين تلاتة ويقرر "يفتي" في مسألة ما اعتقدش إنها محتاجة فتوى .. الناس حتصوم على التوقيت اللي الحكومة أعلنته من هنا أبص ألاقيلك واحد من دول قايل لك لأ.. ليه؟ ماأعرفش..

شكلهم مقدمين على وظيفة في قناة الناس .. وأهي فرصة للناس تشنف نواظرها بطلعاتهم البهية ، وليهم يفتكسوا لنا شوية .. ويقولولنا إيه حكم صيام رمضان لو الصفاقسي التونسي غلب كوتوكو!

توتة :

هو الفراغ وحب الظهور والتعصب المذهبي .. لا أكثر ولا أقل ..

فيه بق قلته من فترة .. وأحب قوي أكرره النهاردة : إحنا طول عمرنا يا مع الفتوى يا ضدها .. ومسألناش نفسياتنا ليه الفتوى دي تيجي أصلاً؟

أنا باستفتي فلان في حاجة جدت أو حاجة مش عارفها .. الفتوى بتبدأ من سؤال ليا أو لغيري وأهل العلم بيفتوا .. لكن الفتوى بقت بمبادرة فردية (زي ما واحد بيقول للشلة ح أعزمكم على حجرين معسل في قهوة لاللو) .. وبتوع الفتوى وأدعياء الاجتهاد يمسكولك حاجات محسومة من أربعتاشر قرن ولا تأثير لها على سير الدنيا ويتكلمولك فيها.. اللي يقول لك التوقيت اللي بنصلي فيه الفجر غلط .. واللي يقول لك الزكاة ضريبة .. واللي .. واللي..

زمان الوصل :

وجهة نظرك وجيهة ، لكن دة يبرر إن شيخ جامع أو إمام في زاوية يطلع بفتوى غريبة زي دي في توقيت زي دة؟

قد يكون من المستحيل أن نهرب من الصيام في الحر ، وسنضطر بنفس المنطق لصيام رمضان كله العام القادم (إن عشنا وكان لنا بإذن الرحمن عمر) بالتوقيت الصيفي الحالي وهذا توقعي الشخصي .. لكن هل من المنطقي في المقابل أن يفتي شخص في مسألة محسومة .. ما هو زي ما ساسو قالت .. لو الفجر اذن 5 والمغرب 7 مش حتفرق عما لو كان الفجر على 4 والمغرب على 6 .. وفي كلا الحالتين الفجر والمغرب بيدنوا ، والصيام مفروض من قبل الساعات دي بأربعتاشر قرن بس!

بالمناسبة .. ما شفناش ليه البهوات بيتكلموا على مسائل فروق التوقيت بين المحافظات وهي أهم ألف مرة من الفتوى الهرائية بتاعتهم دي؟..

هل تعلموا وفقاً للنتائج والتوقيتات المعتمدة من هيئة المساحة المصرية (وهي هيئة حكومية) إن الفجر في شهر يولية بيدن في المنصورة قبل القاهرة بخمس دقائق كاملة.. وكل النتايج أو معظمها في بحري على الأقل فيها خانة لتوقيت المنصورة زي القاهرة وإسكندرية .. إزاي الجدل دة حيتحسم؟.. وكلها كام سنة ورمضان حييجي في يولية .. وحنشوف..

مي 2:

بيتا بلوجر دة عامل لي صداع .. السبب إن قالب المدونة دي متوافق مع بلوجر وما هواش من قوالب موقع بلوجر .. ربنا يستر..

أما عن الآذان والساعة .. فأحسنتِ اختيار التعبير .. وأنا شايف إن كتير من اللي قروا المهزلة دي في المصري اليوم قالوا نفس الكلام..

ساسو :

بمناسبة كل جامع حر في منطقته ، ح أحكيلك حكاية تهلك من الضحك ..

في سنة 1988 على ما أتذكر كان رمضان تلاتين يوم ، وفي السعودية 29.. وفي جريدة المساء أو الجمهورية قريت في صفحة الحوادث وقتها إنه في صباح يوم 30 رمضان في مصر فوجئ الناس في إحدى محافظات وجه بحري بالجامع بيكبر تكبيرات العيد والناس بتصلي العيد في صباح يوم 30 رمضان!

إحنا فعلاً صدرنا الفوازير ، وياخوفي لتكون الفوازير هي الحاجة الوحيدة اللي حنصدرها !

me2 said...

هو بس توضيح بخصوص بيتا بلوجر
نقل البلوج بالقالب الخاص بيه و إن كان مش من بلوجر مش هيعمل مشكلة
بس لأنه تجريبي لحد دلوقتي فبعد ضم الأكاونت الخاص بيا بقى غير متوافق مع تعليقات بلوجر القدريم
أما الإضافات الجديدة و اللي تخص القوالب فمش هتشتغل إلا مع قالب بلوجر نفسه )لحد دلوقتي(
هما فتحوا خاصية الل
Labels دلوقتي بس الباقي لسه و هو مش خسارة لأنها خواص قليلة جدا تتعد على صوابع اليد الواحدة
يعني الخسارة الوحيدة من وجهة نظري عدم القدرة على التعليق و زي ما شفت مدونتي فهي متغيرتش وقالبها متغيرش

كتبت كتير في تعليق ميخصش التدوينه ... أمشي أحسن :)

Jannah said...

انا لفت نظرى فى البوست كلمة جديدة عليا جدا

"الجهابذة"

ممكن تقول لى معناها ايه؟

قلم جاف said...

مي2: ولا يهمك ..:)

كل تقنية جديدة وليها سخفها .. الويندوز اكس بي مثلاً..

جنة :

الجهبذ (بعد بحث على النت): بكسر أو بفتح الجيم تعني صاحب العلم الكبير في شيء ما ، فنقول فلان جهبذ في الشعر مثلاً ، وتجمع على "جهابذة".. هذا والله أعلى وأعلم..

حائر في دنيا الله said...

والله يواد يشريف الحكومة بتاعتنا دي عقلها اصغر من اننا نتناقش في اي حاجة
يعني ايه لازمته التوقيت الصيفي اساسا
وكمان القانون بيقول اذا جاء رمضان في الصيف فالمفروض نمشي بالتوقيت الطبيعي وهو النتوقيت الشتوي
يبقى فين المشكلة
مشكلة في شوية امخاخ فاضية